PROGRAMA SOCIAL

VENRES

3 de Xuño

COMUNICACIÓNS

Presentación de traballos
Os traballos poderán presentarse en calquera dos idiomas oficiais do congreso (galego e castelán). Poderanse enviar propostas para presentación de comunicación oral, póster ou simposio a través da plataforma electrónica ata o 31 de marzo de 2016. Deberase indicar se se desexa optar a premio.
Entregarase un certificado de presentación de comunicación oral ou escrita (póster) só aos traballos expostos con tantas copias como autores/as figuren nel.
Aínda que se tentará atender as solicitudes das persoas participantes, coa finalidade dunha mellor organización dos contidos das comunicacións, o comité científico resérvase a liberdade de asignar os traballos presentados a algunha das modalidades independentemente da solicitude dos/as autores/as.
Modalidades
Comunicación oral: O tempo permitido para unha comunicación oral será de entre 10 e 20 minutos (dependendo do número de comunicacións que integren cada sesión). Os abstracts individuais aceptados para a súa presentación oral poderán ser agrupados polo comité científico en simposios conformando grupos temáticos.
Comunicación escrita (Póster): Cada póster será exhibido durante o tempo que determine a organización, debendo permanecer dispoñible algún dos/as autores/as do mesmo durante unha hora e media, período en que algún dos/as autores/as explicará o seu traballo ás persoas interesadas. O póster terá  unha dimensión máxima de 90 x 120 cm (formato vertical).

Simposio: Cada simposio terá unha duración dunha hora e media, posibilitando a presentación dun mínimo de catro e un máximo de seis comunicacións orais, (presentadas preferentemente por autores/as diferentes) de 10 ou 15 minutos cada unha e un debate posterior que variará segundo o tempo que quede ata terminar a sesión. Para o envío de proposta de presentación dun simposio, requírese que a persoa coordinadora do simposio presente un resumo xeral e un resumo individual de cada comunicación, seguindo as directrices que se indican na plataforma electrónica.
Temática
Aceptaranse traballos centrados nalgún tópico relacionado coa psicoloxía aplicada en calquera contexto (saúde, educativo, organizacional, xurídico, intervención social, deportivo, etc.) e que aborden aspectos de interese a xuízo do Comité Científico. Poderán tratarse de investigacións orixinais, estudos de caso, deseño ou validación de instrumentos de avaliación, proxectos de intervención psicolóxica, exposición de modelos teóricos ou traballos de revisión.
Normas de presentación
Os resumos tanto para comunicacións orais como escritas (pósters), remitiranse mediante o formulario de envío e terán unha extensión de entre 250 e 300 palabras, debendo facer constar ata un máximo de cinco palabras-chave. Deberá incluír información relativa á introdución, obxectivos, método, resultados e discusión/conclusións. Non se poderán inserir táboas nin figuras no resumo. Para presentar un traballo é requisito imprescindible que cando menos un/unha dos/as autores/as estea inscrito/a no Congreso. Se un traballo non é aceptado, poderase solicitar a devolución do 100% das taxas de inscrición. Ningún/ha autor/a poderá figurar en máis de 3 traballos.
Libro de resumos
O libro de resumos do congreso será publicado on-line e será accesible desde a páxina web do congreso.
Premios
Poderase optar a premio na modalidade de presentación en formato de comunicación oral e de comunicación escrita (póster). O comité científico seleccionará os mellores traballos de cada modalidade en función da súa calidade, orixinalidade e riqueza expositiva e dará a coñecer os traballos gañadores no transcurso do Congreso. Establécese un premio de 250 euros para cada modalidade e a organización do congreso estenderá un diploma acreditativo. Os premios poderán declararse desertos.